Buteder taro 200 Roma so majbut olendar si našutne taro Kosovo, beršencar dživdinen an i novopazarsko romani mahala Blaževo thaj si ko but phare šartia bizi elektrika thaj pani.
Ko jekh rodena taro komunakere thaj themakere institucie thaj strukture te šaj an i mahala anel pe elektrika, pani thaj te asfaltirinen pe o droma.
– Taro šerutne rodaja te den suporto thaj udžaraja amare čhave te dživdinen majlačheste. But si phare te dživdinel pe bizi elektrika thaj pani. Našti dživdinaja pobuter an i nahigiena – vakerela o Mefail Džugatani.
O Rom tari akaja mahala o Alija Suljović notirinela kaj o romane čhave trubul te džan an i škola , numa nane ni majhari lokheste soske si but melale.
– Nane amen nisave šartia te ovel amen i higiena , odoleske rodaja suporto taro institucie tari them – notiringja o Suljović.
