E franciakoro Govermenti avgo drom ko anava e Franciake dengja respekti milja Romenge so sine deportirime an o vakti taro dujto lumiakoro maripa. Akava ulo ko notiripa 70 berša taro phanlipa e logoreske Loare.
Prekal e themakoro sekretari Jan – Marck Todegini, o mesaži resel thaj taro šefi e franciakere govermenteske kote o Roma sine čače internirime thaj but mučime ko vakti taro Dujto lumiakoro maripa.
An odoja komemoracia than lele pherdo dizutne, studentia thaj deportirime purane Roma ko than odole logoreske.Akaja bisterdi lokacia avgo drom sine lipardi an o 1991 berš, kana ko dekemvrui odova berš sine čhivdi salde jekh lipar ploča.
Vakrdo sine kaj ko periodi taro 1941-1945 berš taro 1.700 deportirime 1.200 olendar sine Roma.
Jekh taro so ačhile dživde Roma o Denis Henry vakerel:”But chidingjam , siam sine čhave. Me me familiaja siam sine deportirime , thaj o čhave sine ko baripe taro 7 dži ko 12 berš”
Prekal o lafia taro aktivisti Daumas Alen vakerel ka akava gesto bašo lipar si baro akti angle soske o Roma trubul te oven respektirime. Ov akcentirinel kaj odova valjani te ovel thaj e aver logorencar so si an i francia kote sine deportirime thaj baro numero Roma, sa so si Arc-et-Senans (Doubs), an o Fort Barraux (Isère), Saliers (Bus – du Ron), an o Mérignac (Žirond), an o Rivesaltes (Pyrénées-orientales), an o Gurs (Pyrénées-Atlantiques), an o Poatie, an o Montreuil-Bellay (Maine-et-Loire) thaj aver thana.
Ko odola logoria o Roma sine deportirime thaj mučime, a sa akava agorkergja ko dekemvri 1945 berš kana agorkergja thaj o konflikto.
