Odova sine kamlipa taro avgo momenti. Mangipaskiri storia so buteder ka mangen te ovel olen. Oj blondinka thaj parni, a ov kalo , terne, lačhe thaj an o kamlipa. Oj tari Hrvatska a ov taro Kosovo. Ko momenti kana startujngja olemgiri romansa nakhle 4 thaj buteder berša, a i Tea thaj o Mirsad akana dživdinena an o Zagreb.
Olate isi la 30 berša , a leste 28 . Oj si sociologo so kerel buti an o Ventari bašo penziakere studie thaj legarel o programo bašo maripa mujal i ksenofobia thaj rasizmo.
Ov si profesionalno muzičari – bubnjari so bašavel taro pire 5 berša. Trujal so ola o duj si liparde an o pire kariere , ola mangen pe ko piro dživdipa thaj na garavena kaj si but bahtale.
Tea Vidović si biami an o Zaprešić, a o Mirsad Dalipi an o Zagreb alo taro nekanutno Uroševac, a akana Ferizaj – Kosovo.
– Zapendžargjam amen an i Ljubljana kana siem sine ko jekh seminari sar membria taro NGO sketoro taro amare thema. Tegani bijandilo o mangipa. Palo odova i Tea avili an o Kosovo m resljum viza te džav an i Hrvatska trin kurke. Palo odova me rodingjum viza lungo taro trin masekoa. Palo odova angjem decizia te prandina amen, vakerela o Mirsad.
– Ko starti kera sine an i anglikani čhib. Me sium generacia so na siklili i srpsko čhib. Ola vakerena kote panda arakhen pe desave formencar taro segregacia thaj diskriminacia sebepi diferentno nacionalitet, numa o duj džene odova nakhavena le prekal o mangipa.
Avibaja an o Zagreb sebepi o mangipa o Mirsad rizikujngja dži nekote piri kariera. I Tea vakerela kaj našti te dživdinel oj an o Kosovo.
– Mande mire jeria educiringje man kaj trubul te ovav individualco, a ov te ovel kotor taro kolektivo. Akana nane man problemi te bešav leskere familiaja thaj te diskutirina, vakerel i Tea.
Akava pari planirinela te keren o bijav an o Kosovo, soske o Mirsad mangel thaj oleskere te oven odothe ko akava ustavalo akti. Akava biav ka ovel majpakjavutne thaj snimimo kameraja te šaj palo odova kerel pe jekh dokumentarno filmi.
