O ministeriumi bašo lokalno legaripa tari Srbia angja došperavipaskoro akti mujal Ištvan Savaija sebepi čhivdi tabla tari ekstremističko politikani partia “Jobik” tari Ungaria, so nane la registracia an i Srbia. Ki vaktavin taro akava ministeriumi akcentirinel pe kaj o Ofisi bašo inspektorati angja decizia mujal, kote čhijbaja asavki tabal si kontra Kanoni bašo politikane partie thaj dendi si ko adalati an i diz Senta – Vojvodina.
Numa o Ištvan Savaji so si membro an o Jobik ko parlamenti an i Ungaria, ov ko plo FB profili hramosargja kaj nane te ikave i tabla
” E Srbiakoro legaripa reagiringja sebepi so čhivgjum tabal anglal mlo ofiso, thaj olende nane len javer buti. Me ka rodav o stavi tari Delvideka (agjaar e ungariakere ekstremistia anavkeren e Vojvodina), numa me esapinav kaj odova nane mujal o kanoni. I Tabla nane te ikavav” hramosargja ov. Asavke ofisia nane mukhle ni te phraven pe ki Slovakia, Romania trujal so si kotor tari EU sar so si thaj i Ungaria.
I ekstremno nacionalno partia Jobik pendžardi si prekal plo antisemitizmi thaj šovinizmo mujal o Roma. Inače o Jobik ko centari tari Budimpešta vazdingja monumenti – spomeniko e Mikloš Horti pendžarutno premal oleskoro butiukeriba e Adolf Hitlerea ko vakti taro dujto lumiakoro maripa
