An o dekemvri persi berš o sindikalno gono legarel sine 32.102 denari- 521 euro. Odokhare love trubul sine jekhe šatr membrengiri familia te šaj nakhavel o masek. Majbut love jali 13.175 denarija – 214 euro hardžinaja hajbaske thaj pijbaske thaj komunalie, kherutnipa, higiena an o kher daja paše 10.500 denaria – 170 euro.
Baro naegaliteti maškar o čorole thaj barvale.
Aso i majnevi publikacia taro Themakoro ofiso vash statistika ” Anketa e lovenge thaj šartia dživdipaske” paše 56,8% vakerna kote dživdinen but phareste, e lovencar so si len an o masek. Olendar 30% vakeren kote but si phare, 26,8% phare ikljon ko agor e lovencar, 29,9% vakeren kote e masekoskere lovencar ikljon desave pharipaja., 3,6% vakeren kaj ikljoven lokheste ko agor e masekoske, a salde 0.7% vakeren kote but lokheste ikljon an o agor e lovencar so lena an o masek.
O familie lovencar tari kerdi buti an i firma ko masek an o 2015 berš sine len 260 eura an o masek. Odolea so o familie taro ruralno trujalipa sar masekoskiri plata sine len 219 eura a okola taro urbano thana 290 eura. Prekal i kategoria ko agjaar anavkerde kvintilia sikavde si persone so si len majteluni plata an o beršeskoro nivelo thaj ko avgo kvintili sikavde si persone so si len majtikni plata tari buti, korkrorbuti, penzie, imoto thaj socialno transferia.
Te kergja pe paralela e lovencar taro plate so si ko pandžto kvintili olengere beršengere profitia ko butikeriba si 6.749 eura jali 562 eura ko masek. Ko persone taro avgo kvintili o beršeskere plate si 658 eura jali 54 eura an o masek. Akala informacie sikavena bari socialno diferencia maškar makedonikane familie.
Avere rigatar e Themakoro ofiso vash statistika prosek neto plata an o masek ko noemvri persi berš sine 22.380 denaria -363 euro . Odova sikavel kaj ako jekh familia dživdinel jekhe platatar , faktea so i noemvrisko plata del pe an o dekemvri , te šaj te učharel e masekoskere prioritetia oleke falinena panda 9.722 denaria-158 euro. O statistikane informacie sikavena kote 1.4% taro bukjarne an o masek noemvri persi berš na lele plata.
Aso agorutne statistikane informacie o nivelo taro čorolipa an o 2015 berš sine 21.5% jali 0,6% pohari taro angluno 2014 berš. Numa majodorig 445.200 manuša dživdinen an o limiti e čorolipaja. Majhor si o procenti ko butčhavengiri familia 52.2% thaj ko korkoroparvarutne jeria 23,4 %.
