I Vezira Ekmedžić (64) jekh taro majeducirime thaj majšuže Romanja, avdive dživdinela korkori an i baraka thaj o dive nakhavela an o droma parvaribaja e rikonen.
I Vezira Ekmedžić pendžardi sar Veska , dživdinela an i jekh tikni baraka an o Prnjavor thaj e 270 KM (paše 135 eura) penzia sar so vakerela olake si tamam. Anfgleder sine situirimi familia. I Vezira agorkergja hotelersko škola sine la lačho dživdipa thaj ko odova vakti sine majedicirimi Romani čhaj. Numa palo o mariba sa irasalilo. Frdimi sine taro apartmano mulo olakoro dat , a olakiri daj phareste nasvalili .
– Palo o mariba lele amendar o apartmani. Jekhutni sium sine sar Romani so ikavgje man taro apartmani. Sa so si man si akaja purani baraka so dengje la man panda ko 80-to berša , vakerel i Vezira.
O dizutne an o Prnajvor vakerena kaj i Veska dena pe godi sar but šuži terni džuvli. O terne čhave sikaven sine interes olake. Majnaglal kerel sine buti ko jekh restoranti an o Prnajvor , a plao odova kerel sine buti sar higieničarka ko marketi kote reslja thaj i penzia. “Kerav sine buti so sine majužardi, a agorkjergjum ki majmelal buti an i deponia” vakerel i Vezira.
Ki deponia dikhava sine sar frdena sine e mulen džanvarien, thaj taro odova momenti bijandili i mangin premal olende,
Mangava e džukelen thaj sako drom dava len hajbaske.
But hari taro manuša havena i mangin premal o džanvaria, odoleske šunava sine but drom sar akošena man.
– O manuša si rigorozno . Kote te ovav e rikonen khuven a mande akošena. O rikone si lošale kana deja len maro , thaj nane nikaste te keren ola atako. Odova si bilačheste?” pučela i Vezira prekal o asva.
