O Hasan Dudič trujal o bare problemia so si le an o dživdipa ov panda na našavgja piro stili taro humor. Akava nekanutno bokesri si bibahtalo taro dživdipa an o Beogradm taro manuša, žurnalistia thaj aver. Ov mangel te iranel pe ko plo dijando than an o Saraevo sar so vakerel kaj mangela akaja diz majbuter.
Numa ko odova čhinavena le o unukia kasja si but phanlo thaj ola si odoja bariera so čhinaven le te lel po gono thaj te džal peske tari i srpsko šerutni diz.
-Šukjur e Devleske an o Beograd panda isi man manuša kote šaj te pakjav. Odola si mle mangle doktoria kote sako momenti si ola mancar. A me da sium odova so sim sine thaj na iranava man palale. trujal so isi but bilačhe manuša so keren mange problemia” vakerel o čačipa o Dudić.
Ov dengja pe godi ko nakhle vaktia kana sine an o problemia sebepi ple phraleske o Šaban Šaulić. Ov avdive da del pe godi odole momentenge.
-Khelav sine me ko duj filmia. Sebepi o filmi “Sok od šljiva” ikavgje o kotor kote so me glumingjum sebepi so našljum ko vakti kana sniminel pe sine akava filmi em mukhljum e ekipa. Tegani o Šaban akhargja man te džav leja an i turneja so me bizo lafi aljum. Dava man godi kana o Miki Manojlović prezentirinel man sine e lafencar: ” a akana miro manuš so si amen jekh a jekh anav o Hasan Miki” kana snimina sine o filmi ” O šuke kašta majtele si” – vakerel o Hasan.
