O čorolipa tiknjardilo bašo 21,5 % numa majodorig sako štarto dizutno dživdinel an o čorolipa. O nevo rodaripa so kergja o ofiso vash statistika aso lokalno indikatori sikavela kaj persi berš 444 500 dizutne sine telal i linia e čorolipaj. Majhor čorolipa niveloa taro 52,2 % si notirime ko butčhavengere familie, numa majčorole dživdinena o korkroutne jeria.
Aso o sociolozia , bibahtalo si o trendi so bajrola o numero taro familie so si len čhave thaj panda majhor džana ko čorolipa.
O socialno transferia taro themakoro budžeto majodorig si avgo faktori so kerel amrotizacia e čorolipaske. Bizo odola transferia ka resel sine 40,5 %.
O nakhle berša o govermento implementiringja thaj angja paket taro aktia thaj politike so trubul sine te kerel stimulacia ko bukjarnipa thaj e čoroli kategoria dizutnenge thaj te arakhel dopherde love e butčhavengere familenge.
O rodaripa tari Themakoro ofiso baši statistika implementirinel pe sako berš thaj akava si havljardo anglal duj divesa kana i Makedonia ki lista taro Duing bizniso sine rangirimi ko 10-to than sar jekh taro legarutne thema reformatoria. Aver rigatar , o makedonikano standardi si salde 36% taro europakoro proseko.
