Paše 180 čorole Roma taro Pirot thaj o pašipa lele bilovengoro lično karte an i akcia so kergja la o Nacionalno Konsili bašo Roma tari Srbia thaj i organizacia “Iniciativa bašo buvljaripa thaj butikeripa ” tari Srbia.
O deputatia bašo minjoritetengere pučipa thaj membro an o Nacionalno Konsili e Romenge taro Pirot Aleksandar Durmiševič vakerel kaj startea akale beršeske resle 40 čorole Roma te len lično karte. Majodorig lena sine thaj aver. O numero alo dži ko 180 čorole Roma.
Jekh olendar i Rozita Halili kote dživdinel ko phare šartia thaj ko čorolipa vakerel: “Štar berša na sine man lično karta, soske na sine man love. Odoja tikni socialno arka so lava sine hajbaske. Akana em me thaj mo čhavo isi amen lično karte”.
O Durmiševič vakerel kaj bukvalno phirindo taro kher ko kher ki Romani mahala arakhle 180 dženen so na sine len dokumenti baši identifikacia. Odova si baro numero taro čorole Roma thaj akaja akcia si kerdo te šaj te ovel olen respektirime olengere manušikane niamia.. Akaja akcia inicirngja o Dejan Živkovič prezidento ko Odobori taro Nacionalno konsili e Romenge an i Srbia.
