Ko agorutne duj berša i seria čoriba barili thaj daravkerel e dizutnen tari romani mahala Gornja čaršia an o Vranje, kote majbut olendar si Roma. So si majinteresno o majbaro numero kerde čoriba si upral o khera kaskere gazdia si ko stranstvo lungo berša.
Ki akaja mahala isi paše 4.000 Roma thaj majbut sare pendžaren pe maškar peste. Isi kana ki jekh rakj šaj te čoren pe po 4-5 khera. Sa ola čorena pe maškar o vakti taro 2 dži ko 4 javinate.
Majbut taro odola khera o gazdia dživdinena thaj keren buti an o stranstvo. Majbut olendar si an i Germani, so keren buti, šparinen sako centi te šaj keren ple khera thaj kinen andre so trubul. Iisi asavke so si familiarno savore ko stranstvo, thaj ko odola khera niko na kontrolirinel len. Aven taro stranstvo thaj dikehn šokantno detalia, kana dikhen kaj o udara si phagle a andre sa si irame” vakeren o Roma tari akaja mahala. Ola vakeren kote majbut čoren pe tehničko roba thaj aparatia khereskere.
“Čače si akava ladžavo. Ola so čorena majbut čoren TV, DVD kujnsko aparatia thaj aver tehnika. O ziania si bare numa niko na kerel akcia te šaj akava čhinabvel pe.
tari policia vakeren kaj čače bajrol o numero čoriba tari Gorno čaršia thaj isi sa buteder dende aktia čoribaske.
– Ko vakti notirinena. I polica jekhen ka astarel, numa aver palem čorena. Si but čora an i diz. O čora majbut phagen o udara thaj o pendžerke thaj agjaar khuvena ko khera. Akala čoriba tretirinen pe majrigorozno numa o normalno čoriba. Akale aktenge isi krisi sar so si phanlipa taro jekh dži ko ofto berša phanlipa, vakerena tari policia
