O tikne romane čhave našti e aver čhavencar!
O Roma taro Beočin si bičale soske olengere čhave ko gradinke našti te oven ki jekh smena avere naromane čhavencar.
O romane čhave tari gradinka ” Ljuba Stanković” an o Beočin striktno hulavena e si hulavde o čhave taro ple naromane amala!
-Paše 25 romane čhave tari akaja institucia džana ki gradinka salde paloručko thaj nane len nisavo kontakto aver čhavencar, a asavki decizia angja o direktori akale gradinkake.
Akava kerel bare problemia soske o tikne Roma an i gradinka pe naromane amalencar keren lafi salde ki romani čhib, a i resarin e integraciake si o naromano sasoitnipa te šaj sikljoven i srpsko čhib so palo odova lokheste ka šaj te džan an i fundavno škola.
Numa odolestar nane khančo. Amare čhaven niko na sikavela srpsko čhib, odori ola salde khelen peske. Akava si bari diskriminacia thaj nikaste nane havipa amenge. Rodingjem suporto taro institucie numa bizo sukceso-notirinen o jeria e romane čhavenge.
Numa i Ljubica Lazarević o direktori e gradinkake ” Ljuba Stanković” vakerel kaj odova nane diskriminacia thaj o hulavipa e romane čhavenge si salde soske nane than thaj kapaciteti an i gradinka.
-O romane čhave aven ki jekvašdiveseskiri edukacia, a asavki grupa isi lade paloručko. Amen but kamaja te oven savore ko jekh than numa ko momenti nane asavke šajdipa . keraja buti ko odova thaj pakaja kote bašo 2-3 masekoja ka faisalkerel pe o problemo bašo thanjariba thaj akomodacia ko kapacitetia- notiringja oj.
O legarutno e Ofisoske vaš protektiva thaj jekhipa i Brankica Janković vakerel kote akava si čače diskriminacia upral i funda taro nacionalno preperutnipa thaj etnikani funda:
– Sako forma taro segregacia e čhavenge upral etnikani funda si namukhle. Dži akana ni reslja nesavo mujal akti , odoleske akhara e jerien thaj organizacien so keren buti ki protektiva e manušikane hakoenge te den akti dži kozte si čače akala informacie, soske amen tegani si amen kanonikani obligacia te kerea akti mujal dendo akti.
