O Roma tari mahala Bair so si trujal o magistralno druumo Ohrid-Bitola-Prilep erati palem blokiringje o drom ko sa o riga. Holame thaj revoltirime soske sako dive ačhon po nekobor saatia bizi elektrikani energeia, ola čučargje o konteneria gunoea thaj thargje jag. Vakeren kaj akava si jekhutno čhani te iranen i sama te šaj faisalkerel pe olengoro problemi, taro but defektia e električno energiaja.
“nane struja, čhinaven la sako dive. Nae akava avgo drom, ko dive odova kerena po duj-trin droma. O manuša si revoltirime, isi tikne čhave, isi amen frižideria. Vakeraja, reagirinaja te mukhen i struja ” vakeren o Roma taro Bairi.
“Akate isi manuša, isi čhave, Neve beršeske na sine amen struja, sa ko bare dive nane amen struja. Te na čhinavgjam o drumo ola nane te mukhen po jekh duj kurke. Kana keraja blokada, odma mukhena i struja.
Taro EVN vakeren kaj akaja mahala hardžinel nakontrolirimi elektrika thaj si len nalegalno elektrikane saatia. O ekipe si sako drom ko teren thaj keren trampa taro osiguračia, thaj arakhel pe desavo faiali akale problemeske, vakeren taro EVN thaj bičhaven apeli te šaj kontrolirime te len struja an o Bairi.
Sebepi i blokada ko drom so čhivgje o Roma, o trafiko džal taro javer droma thaj agjaar džala pe an i diz.
