Jekh taro konkluzno problemia ko amaro sasoitnipa si o terori so ko agorutne trin decenie kergja i jazia but e manušenge em avutne generacienge. Odova majbut kergje okola so si ko lačhe pozicie. Ko jekh o terori ulo sar jekh legitimno forma te šaj kontririnel pe sa okole personenge so si len diferentno gind em manuša so na mangen te oven telal okola so si len i pozicia.
Jekh taro okola so ilustriringje le majšukar o strukturalno terori si o Mahatma Gandi so vakergja: "Ikeriba e nacia ko čorolipa em nadžanlipa si majbilačhi forma taro terori"
E odova tano amare naciaja so ovel ko momenti.
I strukturalno forma taro terori si asavki forma tari them so keren o sasoitnipa na čaćhe adekvatno ko sa o šartia kote sako manuš ko sasoitnipa. Kana akcentirinel pe i them em o sasoitnipa gindinel pe ko themakere institucie , e kriseskoro sistemi o NGO , sindikatoa em avera.
Sa olen si len jekh forma tari pozicia so keren akcia. Odova so kerel pe si:
1.Ola na implementirinena o kanonia ko odova nivelo sar so trubul em keren buti kosemsi sasti lumia si olengiri sar so avile ko themakoro učipa, a o kanonia istemalkeren len salde kana lenge si lačheste m kerena diskriminacia, thaj na respektirinen o procedure.
2. O legaripa na iranel o kanonia so si diskriminatorsko mujal individue jali grupe, jali keren neve kanonia kote so e manušen čhiven ko na jekh a jekh tretmani.
3. O govermenti anela kanonia te šaj čajlarel olenege apetitia , a na o apetitia e dizutnegere.
4. O legaripa implementirinel o kanonia kote kerel manipulacia e manušenge ko informacie em del bilačhi - jojavni ilustracia kaj si sa lačheste jali o riziko taro olengere interesoa.
5. O legaripa na lerel but te čhinavel jali te del lovengere konsekvence sare okolenge so keren forma taro terori em diskriminacia.
6. O legaripa na kerel ambienti taro jekh a jekh šajdipa savorenge. Majbaro kotor olendar na legarel i gajlja e minjoritetonge numa čaljarel salde pire prioritetia.
7. Nesave individue oven legitimno em legalno ni najhari te legaren i doš.
Akava si salde jekh tikno kotor taro akcentirime egzamploa so sikaven i percepcia tari akaja forma funkcioniriba . odova so šaj te den amen lafi si percepcia tari odoja forma funkcioniriba, a odova si kaj ka keren sa te maren pe mujal odola forme diskriminacia kaj ka šunen o gango e marginalizirime grupengoro em o diskriminirime em kaj na avel niko olende kana olenge majbuteder valjani lenge.
Definitivno sa amenge sar normalno nacia nane te dukhal amen odova majbut te siam sine viktimia taro naamala - dušmania soske taro dušmania našti udžarel manuš šukaripa, . Ama čačutne dukhala kana manušeske so dengja tiri pakjiv em udžare lestar te kerel tuke šukaripa, ikljiola kaj so ov tuke majbaro dušmani em odova salde oleskere personalno interesenge.
