Isi stereotipoa kaj Roma na kamen te educirinen pe but. Amari misia si odova te perava odola stereotipoa, vakerel o Alvin Salimovskiu direktori an I FŠ “Phralja Ramiz thaj Hamid” kote 90% si Romane čhave.
Pobuter taro 2000 sikle, ko paše 80 paralelke thaj 121 profesoria, ki oddelensko thaj predmetno edukacia, I škola “Phralja Ramiz thaj Hamid” taro Šuto Orizari si jekh taro majbare an I them.
„I misia e školakiri ko avgo than si kvalitetno edukacia” , vakerel o Alvin Salimovski o direktori akale školakro.
„Ki akaja škola kerde si but rekonstrukcie jekhe resarinaja o čhave te dikhen I škola sar piro kher”
Numa ni akaja škola nane imuno ko trendi tari migracia so isi ki sasti them em tiknjarel pe o numero e čhavencar.
„Isi but familie so gele avrial tari them, em odori dživdinena nekobor masekoa em palem iranen pe ki akaja škola. Posle odova, pa posle džana aver familie. Em odoleske ko agorutno vakti o numero e čhavengoro konstantno tiknjovela “.
Jekh taro o rizika so arakhel pe I škola si kote o jeria na registririnen pe čhaven te džan an I škola ko rok taro masek maj.
“Aven ko avgust em septembro. O numero nane strandardno. Numa o numero taro čhave ko avgo klasi akava berš em napalal trin berša si taro 250 dži ko 300 “ Isi čhave so čhinaven piri edukacia em na aven ki škola. Majbut sar faktori si kaj nane len jekh than dživdipaske, džana ko sezonsko bukja pe familiaja an I them jail avrial tari them.
Te šaj nakhavel pe adava problem I škola bičhavel e profesoren olende ko khera te keren lafi e jeriencar sar avgo akti te šaj adala čhave pale naaven ki škola.
„O profesoria džana ko lengere khera keren lafi e jeriencar. Te reslem te irana olen an I škola odova si lačhe. Ten a bičhavaja lende edukaciakere medijatoria” Ki govermenteskiri Strategia ki inkluzia e Romenge 2022 – 2030 notirime si kaj ko kotor taro čhave isi tikjnardo sukcesi ko sikljoviba. O direktori e školakoro vakerel kaj majbaro procenti si soske isi finasisko problemia e familien . “ Dži kote o jeria e čhavengere si bizi buti ,, nane len šajdipa pire čhaven te den le sa so trubul te šaj educirinen pe. Ki Amari škola isi čhave so aven taro but čorole familie”.
O Alimovski vakerel kaj jekh taro faisalia si te keren šukar šartia sikljojbaske an I škola.
„Amen sar profesoria našti kera trampa ko lengere khera, ama I škola šaj te kerel pe sar olengoro kher. “.
Premal I Strategia baši inkluzia e Romenge nane sasti infrmacia o numero e Romane čhavengoro an I them s si avrial tar edukaciakoro procesi. Tari škola “Phralja Ramiz I Hamid” vakerena kaj olende odva numero si tikno,ama o šerutno mesaži bičhava dži ko jeria. “ Kama te informirina em te vakera kaj I edukacia si importantno alka ko dživdipa”
