Felalbab Anton tari Komuna Nova Crnja ko plo FB profilo nekobor divesa havljarela statusia em jekh video klipi so kerel lafi kaj kinen pe sine romane hangia ko lokalno, pokrainsko thaj republičko alusariba so ikergje pe ko 24 april akava berš. Ko video klipi o Anton vakerela kote o romane hangia kinela sine bašo 1.500 srpsko dinaria (paše 12 eura) ko manuš, thaj e Romenge dela sine paketia hajbaja te šaj den plo hango bašo Pero Milankov thaj oleskiri grupa e dizutnenge.
O Anton dengja kriseskoro akti mujal o presidento tari Komuna Nova Crnja, Pero Milankov, sebepi so kinel sine hangia thaj nakerdo dendo lafi kote o Milankov trubul te bahamkerel le sar membro an o Konsilo ki komuna.
O Anton ko plo FB profili havljarel fotografia taro dendo Kriseskoro akti. O presidento e Komunake Nova Crnja so taro 2008 berš kana sine membro an o DS dži ko 2012 berš kana palo alusariba formiringja pli biathinali lista . O Milankov ko agorutne alusariba iklilo ple listaja diyutne kote sine jekhto ki odoja lista thaj palo odova gelo ko SNS.
špekulirinel pe kote angleder da o Milankov naoficialno sine membro an o SNS numa udžargja te nakhen o alusariba te šaj oficialno i sasti lista te džan ki Srspko Progresivno Partia.
