I genialnost taro Čarli Čaplin, režiseri, scenaristi thaj akteri thaj oleskiri perfektno transformacia thaj improvizacia kergje leske zorali thaj buteder faktea majuli pozicia an i historia e lumiakere filmsko industriake.
Biamo an o 16 aprilo 1889 berš an o London, oleskere jeria mukhle pe kane e Čarli sine le salde 3 berš. Ola keren sine buti an o cirkusi.
O Čarli taro tikne pre sine korkori pea so palo odova sa kergja ko filmsko faca sar bibahtalo thaj humoristikano bikjerutno so ka pherel o hale an o sinema ki Europa thaj i lumia.
Ov angleder te ovel filmsko stari kerel sine buti em sar bikinel lulugja, ki fabrika srčenge, portiro, legarel sine kašta, numa ko jekh sikljovel sine tanco, žongliriba thaj akrobatika.
Ko 1910 berp gelo tari Britania thaj alo an i USA.
Ko agor taro 1913 berš zapendžarel pe e filmsko producentea Mark Senet thaj gelo ko Holivud.
I rolja taro bibahtalo thaj komično tipiu reslja la namangle, kana taro oleskere kolege lelja šea, sar so si o buvle pantolke, o tikno sako, čhivgja cilindro, lepingja kale mustakia thaj o bastuni taro bambusi, kana biandili odoja rolja.
O filmi ” O baro diktatori” , o korkoro Hitler dikhlja le ki privatno proekcia numa ko jekhvaš filmi iklilo thaj na dikhlja i proekcia dži ko agor.
Prandingja pe 4 droma sine le 11 čhave. Ov but mangel sine ternen džuvljen. I Milderad Haris sine la salde 16 berša kana prandingja pe bašo Čaplin ko 1918 berš, thaj oleske sine odova jekhto prandin. Dujto romni sine leske i Lita Grej so sine la 16 berša thaj oj sine akterka. I trinto romni taro Čaplin sine i Polet Džuliet Godar, so na reslja te lel i rolja ko filmi ” Gone with the Wind” – Gelo bavlalaja, soske na manglja te vakerel kaj si prandimi e Čaplinea. Olate tegani sine la 19 berš, thaj sine majbari taro sa o romnja.
Ko ple 53 berša o filmsko mago 4-to drom prandinela pe sar so korkoro vakerel e romnjaja taro oleskoro dživdipa e 17 beršenegere Onom O Nil , čhaj taro pendžardo amerikansko dramaturgo o Judžin O Nil.
Ko vakti kana kerel sine o filmia nikana na sine le kerdo sinopsis – scenario, numa o idee kerel sine kana kerel len sine ko odova momenti.
Jekh drom kana sine majpopularno , anonimno apliciringja ko jekh šou kote kerel pe sine emitacia oleskere roljake taro anonimno manuša, ko majšukar šaj te emitirinel ole, sar Čarli Čaplin.
Ko odova šou, so ni jekh na džanen sine kote ov da aplicirngja, ko agor asatrgja slde o trinto than ki emitacia.
Ov mulo ko sojbe ko Krečuno ko 1977 berš ki švajcarsko diz Veve kana sine le 88 berša.
Kana mulo da palem na sine rahati. Oleskoro trupo čorgje taro limoria desave polsko emigrantia, thaj rodena sine 600.000 dolaria tari oleskiri familia te mangle te iranen oleskoro trupo ko limoria.
Palo odova o čora sine astarde thaj oleskoro trupo sine arakhlo 20 km taro limoria
