Bajrardo si o numero kote o Romane džuvlja so aboritirnen nalegalno an o privat ordinacie, vakeren tari Iniciativa e Romane džuvljenge tari Šuto orizari. Asavki progresia taro nelegalno abortusia si notirime an o Šuto Orizari kote o džuvlja taro socialno teleperavde familie anen decizia te abortirinen nalegalno sebepi o kuč love so trubul te pukjinen an i Klinika baši ginekologia , thaj sebepi i procedura so trubul te nakhel te šaj del pe decizia bašo abortusi. Akalea čhivel pe ko riziko plo dživdipa thaj sastipa vakeren tari Iniciativa e Romane džuvlenge.
“Džanaja save rizikia garavel o abortusi kana kerel pe ko na lačhe šartia , bizo opreaciono hale, numa o džuvlja anen decizia te džan odori soske si pohrai love taro themakere hospitalia” vakeren o terencia so džanen akale situaciake.
„Sar so vakerena o romnja si amen havljarin kaj ola o nalegalno kerdo abortusi majbut fore pikjinen po 3.000 denaria (50 eura) thaj si momentia kana phanen lafi e ginekologoa, te pukjinen kana ka len o socialno. O Romnja aven akate amende ko Konsiliari “Sakam da kažam” thaj šučena šaj li te da len finansisko suporto te šaj pukjinen o abortusi an i Klinika baši ginekologia, numa kana vakera olenge kote nane asavki varianta pukjibaske ola anena decizia nalegalno te keren o abortusi” vakerel i Sakua Bekir Halim , terensko aktivisti tari Inciativa e Romane džuvlenge an o Šuto Orizari.
Odoleske i Iniciativa e Romane džuvljake rodena džovapi taro Centari socialno bukjenge si li desavo fondi kote ka šaj del pe suporto e čorole Romnjenge te šaj pukjinen o abortusi an i Klinika baši Ginekologia.
„Rodingjem antvorto te šaj del pe lovengoro suporto jali jekh drom dendo suporto te pukjinen legalno o abortusi an i Klinika baši ginekologia. Odothar reslja antvorto kaj asavko fondi nane len ” vakerel i Salija Bekir Halim.
I moldi taro jekh abortusi sa e procedurencar an i operaciono hala ki Klinika bašo ginekologia si 6.812 denaria (110 eura). O romanja taro čorole familie nane an o šajdipa te pukjinen odova soske o socialno love nae ko odova nivelo thaj anen decizia te keren o abortusi nalegalno kote pukjinen jekvaš tari odoja moldi.
Pučlja pe an o Fondi bašo sastiupaskoro siguriteti thaj an i Klinika baši Ginekologia šaj li te keren desave procedure te šaj bilovengoro jali majtikne participaciaja te pukjinel pe o abortusi e socialno teleperavdi kategoria džuvlja. Odothar vakergje kote bilovengoro abortusi kaj isi medicinakere indikacie sar egzamplo maloformacie, mulo fetusi jali o khamnipe si riziko e dajake. Abortus taro namedecinakere aspektia kote si sebepi i daj taro ekonomikano aspekti našti arakhel e čhave, odova abortus pukjinela pe.
