O anav taro Faik Abdi prekal okola so pendžarena oleskere kerde aktivitetia an i emancipacia e Romane populaciake sar an i Makedonia agjaar thaj avrial olestar si bare.
Odova sar so informiringjem mulo ko 02 oktomvri ko 79 beršengoro phuripa an o Skopje. Ko oleskoro agorutno drom sine legardo ko 3 oktomvri a odothe ale paše 150-200 manuša!
Pobuter olendar si paše familia, thaj manuša so respektirinen sine oleskiri buti.
Ko akava bibahtalo momento sar jekhutni roš sine kote than lele sa o lideria taro politikane romane partie thaj aver pendžarde Roma taro politikano thaj aver dživdipa.
Numa akana dela pe o pučiba, soske o Faik Abdi na sine kerdi majbari sama thaj respekto taro avera Roma? Si li e manušen hoš bašo kerde aktia so kergja akava baro Rom?.
O sasto dživdipa taro Faik Abdi sine naeskponirime. Asavko sine thaj oleskoro paruniba, biyi bari eksponencia thaj ceremonia. Trujal nekobor plus romane NGO aktivistia thaj aver manuša nasine.
Kobor amen o Roma siam svesno bašo desave persone so angje baro benefit thaj ki disavi forma te irana oleske respektea.
E kako Faikoske trubul majbaro respekto te kerel pes! Te na aver trubul sine majbaro numero manuša te aven. Trubul sine majbaro repekto ko oleskoro agoritno dromaripa!. Numa amen (o Roma) siem asavke. O šukaripa but siga bistraja. O manuš so sine iniciatori te formirinel pe i jekhto thaj jekhutni Romani komuna an i Makedonia thaj an i lumia trubul majbut thaj majbaro kerdo respekto! A trubul sine te kerel pe numa thaj jekh komemorativno bešin an i komuna.
Akava neka ovel sar motivo thaj apel dži ko institucie thaj romane političaria thaj aktivistia. Te del pe rodaripa dži ki them te kerel pe jekh lipar -spomeniko anglal i komunakiri institucia an o Š.Orizari. Odova šaj kerel pe oleske! Ko periodo so avel te mkerel pe inicativa te anavkerel pe desavi institucia jali obejkto aso oleskro anav, jali desavo aktiviteto thaj programa so ka legarel oleskoro anav, sar respekto thaj lipar olekere kerde aktenge so kergja e Romane populaciake.
Kako Faik, lokhi ti phuv!
