Ko 6 avgusti ko pašipa taro Gorno Orizari  trujal o drumo sine arakhlo džuvljano leši ki kali kesa. Pali kerdi obdukcia sine identifikujme kaj si odoja 30 berđengiri romani džuvli taro Šuto Orizari.

Palo odova tari policia vakergje kaj oj si mudardi kote sine khuvdi zorale predmetea thaj palo odova sine frdimi trujal o drumo pakjardi ki kali kesa. Palo odova iklile informacie kaj isi len persone so si šubikjerde akale mudaripaske.

Palo odova na sine le nisave aver informacie dži kote si o rodaripa. Premal naoficialno info šubikerde si duj persone taro Šuto Orizari numa premal odova so nane len faktia , o akti mujal olende si akana ačhavdi numa ola palem si telel opservacia.

Ko jekh naoficialno havel pe kaj jekh olendar si triandaberšengoro murš so aso notacie ov e mudarde džuvljaja džanel pe sine but šukarm sine len sakodive kontaktoa thaj sine ki naformalno konekcia.

Odole faktea , naoficialno telel policiakiri opservacia so ko maškarvakti i policia dikhel o faktia thaj eventualno te arakhlja nesave dokazia ka len majodorigatne kanonikane aktia.

Ko rodaripa udžarel pe suporto te del thaj i analiza taro lende parmakia so eventualno arakhen pe ki kali kesa kote sine čhivde o leši e džuvljakoro.

Palo lungo thaj pharo nasvalipa ko 8 Avgusto 2019 berš khere ko Šuto orizari - Skopje ko 87 -to berš mulo o Refet Sulejman, majpendžardo maškar o manupa sar Papo Alfonso.

Maškar o manuša o Refeti sine pendžardo premal piro ternikano karakteri thaj trujal o berša sikavgja vitalnost thaj sine manglo taro sa o generacie. Sine pendžarutni dizjakiri faca thaj sine le amalipa sae generaciencar.

Ko jekh aso oleskoro omptimistikano thaj phravdo karakteri khelgja nekobor aktersko rolje ki TV em ko filmia ko spotia thaj reklame.

Počmingja ko jekh humoristikano serialia ki TV BTR Nacional barabutne e ekipaja tari Ajgara bend thaj aver humorsitikane teatarsko performansia.
Ko jekh khelgja tikne epizodne rolje ko filmia tari Emir Kusturica "Crna Mačka- Bel Mačor, ko "Šampionite na Šutka" thaj ko nekobor video muzikakere spotia thaj reklame.

Olekere kafe pause ko centro e dizjake sine sar oleskoro sakodivesa , thaj but droma sine notirime taro manuša trujal olskere berša em phravdo rui, parno odolo thaj oleskere naracie taro oleskere avanture sar akate agjaar ki sasti Europa.