I Bajsa Arifovska si unikatno an i lumia tari tradicionalno makedonikani muzika. Oj bašavela majhari ko 15 instrumentia, komponirinela, thaj 11 berša si profesori an o DMBUC "Ilija Nikolvski Luj" kote e siklen educirinel sine nacionalno purane instrumentia. Akana kerel buti sar instrumentalisti thaj asistenti e orkestareske ko nacionalno asambli "Tanec".
Pobut taro 20 berša dromarela an i sasti lumia thaj buvljarel i storia e makedonsko tradicionalno muzikake , thaj okola so respektirinen olakiri buti anavkeren la sar "maestro". Dži akana sine lašel koncertia , kergja buti bare artistonencar, thaj si jekhto Romani so komponiringja muzika bašo baleti.
Kerel pe lafi bašo baleti "Phago suno" so hramosargja le ko 2009 berš. I Bajsa si ko but bukja kote si jekhto, soske sar so vakerela dži akana phaglja but tabu teme. Kana ka dikhen ola sar maestralno bašavela gajda, jali davuli olakere kolege džanen te vakeren kaj oj kerela but šukar" o muršane bukja".
Olakoro aktivno ilo rodel neve momentia thaj sar so vakerela korkoro nane nikana te čhinavel te rodel ko isntrumentia rodibaja perfektno toni.
– Mi mami i Zenka bašo mlo oftoto biando dive kingja mange mandolina, numa vazdingja la ko ormano soske trubul sine ki olate te bašavav ko trinto klasithaj ma te ruminav ola. Em normalno me kana na sine niko khere ukljav sine , dikhava la sine thaj bašavav sine ki late.
Majanglal bašavgjum ki kjemana, pa ki flejta, em paralelno ko piano, a palo odova sikavgjum interes e klarineteske.
Sako instrumento isi le ple specifike thaj trubul vakti te sikljovav ole. Ama na ačhiljum an i klasika, soske sako drom agorkerav sine desave motivencar taro nacionalno repertoari. Sako drom kana sikljovav sine nesavi melodia sar egzamplo ki tambura, kamav sine te dikhav sar oj ka ovel šundi ko duduko - kavali. E profesorenge sine interesno so me sium asavki ama pučen sine kote ka avel mo agor. Ake odova mlo interes bašo sa na mukhel man ni avdive dive - vakerel i Bajsa.
Kana sine brucoši an o Fakulteto bašo muzikakoro arti an o Skopje, but droma ačhol sinen anglal o udara taro profesori Dragan Dautovski ko trinto etažo.
– Saatencar tergjovav sine odothe, mangav sine odola tonia taro nacionalno instrumentia. O profesori nekobor droma dikhlja man thaj jekh drom vakergja mange:" Avdive pak sian akate. Ajde khuv andre". Ov prependžargja mli mangin thaj agjar ulo mlo mentori sp ka legarel man ko lavirinto e tonenge. Dava man godi an o kabineti sine but stidentia , kilimi em sa mange sine sung tari tradicia. Agjaar startujngja amari konekcia thaj šaj te vakerav kaj si odova mange moldimo džanlipa, ekstra sar scensko performansi. Lačhe si kana uzal tute isi nekaste so si le baro džanlipa, so džanel te del tut energia te lgarel tut ko čačuno drom. But sikliljum an i praktika thaj taro phureder so bašaven sine čalgia: Raim Baki thaj Hustref Said, a o Zoran Džorlev si manuš so angja ma ko "Tanec, kote prependžargja mlo avutno porfesionalno karakteri akate- respektea notirinel i Bajsa Arifovska ple profesorenge. Numa po desavo drom si bibahtali so si hulavdi taro ple studentia kaste oj sikavela sine len.
